على جنب

مش عارف أذاكر..مزاجي وحش..وقطر البدرشين الجنود الغلابة في أول شهر في السنة الجديدة قلب عليا مواجع قطر أسيوط وأطفال المدارس اللي راحوا اخر السنة اللي فاتت..

العيال عاملين دوشة في البيت..عايزين يغيروا جو..وأنا بتلكك عشان ما اذاكرش..كأي مواطن مصري..المذاكرة دمها تقيل..

وصلتهم للموقف..وقلت ارجع اذاكر براحتي في البيت لانه هيبقى فاضي وهادي..

البيت من غيرهم كئيب وممل.. الانسان ده مبيعجبوش حاجة..

قولت لنفسي أطلع ع المركز الأوروبي للغات -بحكم شغلي فيه-  أشوفلي أي ركن أذاكر فيه..وأنا في الطريق قررت أدفع اشتراك النت بالمرة.. ركنت ركنة ملهاش أي تلاتين لازمة.. ونزلت لقيت عربية شيفورليه كروز ماشية وبابها مفتوح واللي سايقها مطلع رجله الشمال برة والعربية مازالت ماشية ومع رجله الشمال دماغه بدأت تطلع برة هي كمان وخارج من منطقة الجمجمة مجاري.. شتايم قبيحة جداااااا..

 على وزن.. يا ابن المرة الو…..لو راجل اقف يابن الشر… ده أنا هطلع ديك أمك يا بن الو….

أدامه عربية صيني صغيرة..ماشية على مهلها والراجل مطلع دماغه برة برضو..وبيبدع في الشتايم الزبالة بردو.. بس بابه مقفول ومعاه طفل في العربية..

مازال الراجل اللي ورا بيشتم وبيطلب منه يقف.. والراجل اللي أدام مازال بيشتم بس ماشي..غالبا عشان الطفل اللي معاه قرر القرار الصحيح انه ميتخانقش.. لحد ما الراجل اللي ورا قاله يا جبان يابن الو… أقف عشان اطلع ديك أمك..

في اللحظة دي الراجل اللي سايق العربية اللي ادام عمل حاجة في منتهى الغرابة..والعربية ماشية..طلع شومة من الشباك ..غالبا عايز يقوله إن معايا حاجة ممكن أئذيك بيها وأكسر عضمك..

يقوم الراجل اللي ورا اللي مصمم يتخانق يقف خالص ويجري ناحية شنطة عربيته بهيستيريا وفتحها وطلع حديدة قصيرة..

المسافة بين العربيتين حوالي سبعة متر وفيه راجل ابن حلال مسك الراجل أبو حديدة..ومفيش غيري ماشي..جريت بسرعة ناحية الراجل الضخم أبو شومة..طبعا شرحلي المشكلة بصوت عالي ..وشي غرق رذاذ .. بس انا قررت ما اسيبوش يتقدم خطوة..وقعدت افكره بابنه الصغير اللي بيعيط في العربية.. وهو مكنش عنده النية يتخانق..متعبنيش في الاول..

 

الراجل ابو حديدة اللي كان مصمم يتخانق ما زال بيشتم ومازال مصمم يتخانق..لحد ما الناس اتلمت ..تتفرج..أه والله..الناس زحمة ..ومفيش غيري أنا والراجل التاني اللي ماسكين الوحشين الثائرين..

 

الراجل اللي انا ماسكه بدأ يتعصب..والناس اللي تعرفني شخصيا..أكيد عارفين ان فرق الوزن أو الحجم دايما مش في صالحي..ضربني وهو مش واخد باله..ضربتين فعلا وجعوني..

ابو حديدة اللي كان مصمم يتخانق جاب ورا..وراح على عربيته..وانا متمرمط مع أبو شومة ..بجد تعبت..

وفجأة ظهر أحدهم ..صديق للراجل اللي انا ماسكه.. وفي ثواني لقيته شاورله بدماغه ع العربية الكروز الحمرا اللي سايقها الراجل ابو حديدة..وبيقوله نزل لي ابن الو…  ده يا إيهاب عشان أطلع ديك أمه.. وعمال يقولي ابعد انت يا أستاذ ..وانا اترجاه عشان خاطر ابنه..واقوله صلي ع النبي..ووحد الله والكلام بتاع فض الخناقات ده..وهو ولا في الدماغ.. وفلت مني وطلع يجري..كانت عربية هتشيله بس ربنه كتبله عمر جديد.. الحكاية دي كلها حصلت في نص الطريق..

صوت الفرامل وسواق الميكروباص خطف انتباه الجميع لثواني..وخصوصا لما قال على جنب يا ولاد الو… ..ولعوا في بعض على جنب يا ولاد الو… وسابنا ومشي..

الراجل أبو حديدة بيحلف لايهاب انه معملش اي حاجة وانه مغلطش في الراجل ابو شومة.. وطبعا ده عكس الحقيقة بالظبط.. كان نفسي اروح اقوله يا ابن

الو… انت اللي كنت عايز تتخانق.. انت اللي جبااااااااان..

طلعت دفعت النت..وانا بنهج ومهنج ومش قادر اخد نفسي

😦 

 الدروس المستفادة من القصة دي..

لما تكون فاضي روح بيتك واتلم وبلاش سنكحة

لا تؤجل خناقة اليوم إلى الغد..

لا تشتم ولكن اضرب على طول..

اركنوا على جنب وولعوا في بعض يا ولاد الو…

لازم يكون معاك حاجة أو حاجتين احتياطي في العربية لزوم التهويش..

النهاردة بالليل هتمرن من تاني ع النونشاكو اللي في العربية.. 

متعملش فيها سبع رجالة وبعدين تجيب ورا..خليك متزن

حاول تمتلك سلاح ناري

مبيتخانقش غير الناس الواطية فبلاش تبقى واطي

سلامو عليكو

Advertisements
على جنب

3 thoughts on “على جنب

  1. Aziza Salama says:

    هههههههههههههههههههه احداث متكررة كل يوم بس انت اخدت درس فعلا عشان كنت جوا الحدث 🙂 🙂 🙂

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s