دكتور الاسنان ونائب البرلمان

“1” 

“مفيش فلوس”

   أبريل 2012

 

 مشكلتي أنا مبروحش لدكتور الاسنان الا لما يكون الوجع اللي انا حاسه أكبر من الوجع اللي هيعمله الدكتور وهو بيعالجني! بترعب من كرسيه وأدواته وبحس اني رايح ابقى ضحية في فيلم رعب!

واقف في لاب خمسة في المركز الأوروبي .. بشرح فرب تو بي .. وضرسي هيموتني من الوجع..أول مرة أشرح وانا مكشر..الطلبة مستغربين وبيحاولوا يدوروا في وشي على سبب قفلته..فاكريني متضايق منهم..وأنا بحاول ابتسم بس الألم كان أقوى مني..

اعترفت ان سناني بتوجعني ..

الطالب اللمض علي الشيطي..قالي ان اخوه دكتور سنان.. سألته بيحشي الضرس بكام لو عصب ؟ وبكام لو عادي؟ قالي معرفش.. خدت تليفونه احتياطي بروح مرشد سياحي قوته في كمية الارقام اللي معاه..

وفات اليوم.. وأنا مروح جبت علبة مسكن جديدة مكان اللي خلصت..

كل يوم كنت بسف شريط ..بس في الليلة دي خدت حباية قبل ما انام معملتش حاجة..خدت التانية ..الالم خف ونمت.. لكن صحيت على كهربا واصلة للمخ.. خدت حبايتين والفجر بيدن..مضمضة الوضوء ضيعت مفعول البرشام.. خدت حبايتين تاني بعد الصلاة..

لما طلع النهار كلمت علي الشيطي..قلتله يحجزلي..وبعدين اكتشفت ان الفلوس اللي معايا يدوب تكفي لاخر الشهر لحد ما اقبض من السنتر.. اتصلت لغيت الحجز..

نزلت اشتريت علبتين مسكن احتياطي..

بدأت اتعود عليه..ومعدش فيه الم..

قبضت في اول مايو..دفعت قسط العربية..واللي اتبقى يدوب..قلت مش مشكلة انا حاسس اني هطلع رحلة في شهر مايو..حاجة تسند جنب التدريس..

لقيت التليفون بيرن وأحمد العطار شركة رمسيس ع الشاشة..ياااااااااااه فرحت أوي.. طلعت الرحلة .. ولما رجعت البيت..اول حاجة عملتها اتصلت بعلي وحجزت تاني يوم..

________________________________________

“2” 

الحرية والعدالة

مايو 2012

عيادة الدكتور في فارسكور..مركز تبع محافظة دمياط على بعد 15 كيلو من بيتي..

قعدت على اكتر كرسي بكرهه..مع انه مريح جدا.. اترجيت الدكتور يكتر البنج.. الدكتور مختلف جدا عن اخوه الطالب بتاعي..شاب عنده 25 سنة..هادي.. مبتسم.. واثق..وشه يطمنك ..بس انا بردو كنت مرعوب..

جاب حقنة البنج وطلب مني افتح بوقي..طلبت منه ادخل الحمام..مقدرش يقاوم ضحكة فيها سخرية مع شفقة..

رحت ورجعت وانا بتمنى الارض تتشق وتبلعني..او تخبطني طلقة قناص اموت من غير ماعرف ايه اللي حصل..

اللهم لا سهل الا ما جعلته سهلا وأنت تجعل الحزن ان شئت سهلا..محسيتش بأي حاجة..الم لا يذكر..حشو عصب..الالم زاد شوية بس بردو محتمل..بجد انا مش مصدق..ايده الخفيفة زادتني ايمانا بجيل التمانينات اللي انا بتشرف اني منه..

لسه جلسة كمان والضرس يبقى تمام..من كتر ما انا مبسوط قررت اعمل كل الشغل اللي في سناني..والحمد لله ان الرحلة دي جت برزق بوقي..

ميعاد الجلسة التانية جه وخايف اروح..فوت يومين بعد الميعاد المحدد..ولما لقيت الحشو الاحتياطي بدأ يقع..قلت خلاص هروح بكرة..

وبكرة جه وصحيت بدري في منتهى النشاط والسعادة والاقبال على الحياة وكنت في لجنتي الساعة تمانية ونص وبعد ربع ساعة كنت بحط استمارتي الانتخابية وفيها علامة صح كبيرة لابو الفتوح..

خرجت من اللجنة اخف وزنا ..حاسس اني ماشي في الفضاء..حاسس اني لو جربت ارفع ايديا وارفرف في الهوا هطير بجد.. حتى العربية حسيتها انعم واجمل..والناس على وشوشها ملامح الرضا.. اخيرا صوتي هيروح في مكانه الطبيعي..القاضي كان متشدد اني اغمس صباعي في الحبر لحد اخر الازازة..وانا اللي كنت واقف بره بتريق ع الناس اللي محمية صباعها حبر.. وبقول كده الحبر هيخلص بسرعة.. اتاري القاضي هو السبب.. متفاءل بمصر..متفاءل لمصر..

وبالليل كنت عند الدكتور..

في الجلسة التانية .. الموضوع خلص والالم انتهى..وسألته على سعر التركيبات اللي انا محتاجها.. وقبل ما يقولي الاسعار..سألني انتخبت مين؟وقبل ما اجاوب قالي هي حرية شخصية طبعا ولو مش عايز تجاوب بلاش.. وقبل ما اجاوب خدت ثانيتين افكر ..يا ترى توجهي الانتخابي هيأثر على سعر التركيبة ولا لأ؟ لكن لقيت ان مفيش احسن من الصراحة.. ولما سمع اسم ابو الفتوح..بصلي بصة مقدرتش افهم معناها وسألني أنا بشتغل ايه؟

للمرة التانية حسيت ان سؤاله مرتبط بسعر التركيبة ..

لكني جاوبت بفخر وحب.. مرشد سياحي..

معلقش..قالي خلاص كدة..متاكلش عليه لمدة ساعة.. وأنا بدفع بقية الحساب عيني جت على أخر علامة كنت اتمنى أشوفها عنده..عشان انا بجد حبيت الدكتور ده لكفاءته أولا..و ثانيا لأنه فعلا عمل معايا واجب في الأسعار ..أما السبب الاخير لاحترامي له..أنه فعلا يستحق الاحترام.. لكن لما شفت اللي أنا شفته..كانت نازل بدون ألم في الضرس..لكن بألم في القلب..

وللحديث بقية..

_________________________________________________________________________________________________

“3”

مرسي  vs  شفيق

الأربعاء ٢٣ مايو ٢٠١٢

وانا راجع البيت كان مسيطر عليا فكرة واحدة طول الطريق.. مين الاتنين اللي هيوصلوا للإعادة في انتخابات الرئاسة..وكل الاحتمالات شغالة في دماغي زي موج البحر..

كل اما يخبطني احتمال حلو.. افرح.. لحد ما ييجي في دماغي احتمال وحش..يقلب مزاجي وانطره برة الجمجمة في نفس الثانية وارجع للاحتمال الأحلى على الاطلاق وهو ان حمدين يصفي مع ابو الفتوح ونخلص..وفي الحالة دي لو منزلتش الإعادة .. حقيقي مكنش هتفرق معايا..

سيطر عليا احتمال مرسي مع ( شفيق او موسى) مكنتش متأكد بصراحة مين فيهم مرشح المجلس العسكري..

احتمال قتل كل السعادة اللي جوايا وخلاني افتح النت (وانا سايق) اشوف نتايج أولية جداً ..

حملة كل مرشح بتأكد تفوقه.. يعني ايه يا جدعان.. لما يبقى عمرو موسى واثق من الفوز.. والإخوان بتأكد اكتساح مرسي.. وحملة دعم ابو الفتوح بتأكد انه الأول لحد الان..وحملة حمدين بتقول ان كل الصناديق حمدين.. وشفيق بتقول ان “المحترم” رئيس مصر القادم..

طبعا أنا صدقت حملة حمدين وأبو الفتوح .. وفضلت عايش ع الأمل .. سعادة ما بعدها سعادة لما تلاقي اتنين أيدوا الثورة ووقفوا جنبها حتى النخاع.. اتنين بيعشقوا مصر حتى الثمالة .. بيصفوا في الإعادة..

كان نفسي يكون معاهم البرادعي.. اللي كل الناس بتقول عليه عميل.. والسبب ان مبارك عمله عميل بالعافية.. تسأل اي حد هو عميل ليه؟ يقولك يا عم الحج ده عميل جامد أوي.. ده راجل وحش.. ليه يا عم الحج؟! هو اللي دخل امريكا العراق.. وبضغطة بسيطة ممكن يفتح اليوتيوب (أو تفتحهوله انت هو انت صغير؟!)  ويكتب ( تقرير البرادعي عن العراق ) وياخد اكبر صدمة لما يسمع البرادعي بيقول قبل الحرب بأسبوع انه لا توجد اي مؤشرات او دلائل عن وجود اي أنشطة نووية في العراق التي أبدت تعاون كبير مع الوكالة .. البرادعي اللي امريكا بحق الفيتو منعته من تولي الوكالة لفترة تانية بعد تقريره عن العراق.. بس نقول ايه؟! كلنا بنجيب أهرام الجمعة!

انبطاح جامعة الدول العربية بقيادة عمرو موسى سكرتير الطواغيت هو اللي دخل امريكا العراق!

لسه الطريق مخلصش.. احتمالات مبتخلصش.. وأفكار كتيرة بتهاجم بدون رحمة ..

يا خبر بفلوس بعد بكرة يبقى ببلاش..اول مرة منبقاش عارفين مين هيبقى اول حاكم حقيقي لمصر من ايام نختنبو التاني..

وصلت البيت ..على سريري بعمل ريفرش لموبايلي كل خمس ثواني في انتظار خبر جديد..

ومازالت كل حملات المرشحين بتأكد ان مرشحهم الاول وباكتساح.. وانا ما زلت مصدق حمدين وعبمنعم..

الخميس ٢٤ مايو ٢٠١٢

صحيت الصبح خدت اخويا مدرسة بعيدة في مكان اول مرة اروحه ودخلت معاه اللجنة وانتخبنا ابو الفتوح..مكنوش عايزين يدخلوني لما شافوا الحبر في صباعي.. لكن لما عرفوا ان اخويا من بطيئي التعلم.. المستشار كان رائع وكان عايز يقوم يساعده بنفسه..

رجعت البيت خدت ام العيال ورحنا راس البر.. لجنتها هناك.. هي وكل العيلة بردو انتخبوا ابو الفتوح..

سايق..باكل..بتكلم مع حد.. بذاكر..بتكلم في الموبايل..بشتري حاجة..حتى الحمام..

كل ده كنت بعمله بنص دماغ.. والنص التاني كان في ايدي بيعمل ريفرش على مواقع الاخبار!

الجمعة ٢٥ مايو ٢٠١٢

أنباء مؤكدة عن وصول مرسي وشفيق للإعادة .. اسودت الدنيا في وشي..

على كل حال النتايج مش نهائية.. كل دي توقعات وحسابات أولية..

مرسي ماشي يوصل إعادة بأصوات الاخوان والمجموعة المغسول دماغها حواليهم.. وضيف ليهم عشاق الزيت والسكر الإخواني .. لكن شفيق.. ازاي.. ازااااااااااااااااااااي؟!

السبت والأحد ٢٦ و ٢٧ مايو

يومين دمهم تقيل ومش عايزين يمروا ..وبقى كل أملي في الحياة ان حمدين يلحق المركز التاني مع مرسي.. ااااااه لو كنت اعرف ان فرصه أعلى من عبمنعم..

السلفيين أيدوه على استحياء .. ياريتهم ما أيدوه.. أيدوه بوقيقي.. ضيعوا منه أصوات كتير .. وفي نفس الوقت منزلوش بتقلهم!

عشت على أمل ان اخر مجموعة لجان تطلع كلها حمدين..ويلحق.. ده كان أملي الوحيد..ورجائي الوحيد.. ودعائي الوحيد..وخصوصا بعد لما لقوا أوراق في القصب كلها حمدين!

أحلامي كلها كوابيس.. ظهر فيها جمال مبارك وصفوت الشريف وأحمد عز  والعريان ومهدي عاكف وخيرت الشاطر في احداث متقاطعة ومتنافرة في وقت واحد..بقوم من النوم متعكنن جدااااا..

الاثنين ٢٨ مايو٢٠١٢

صحيت من النوم محبط..من زمان اوي ما جاليش إحباط بالحجم ده.. وحتى لو جالي.. مكنتش بسيبه ينتصر عليا.. بس لازم اعترف انه المرة دي انتصر عليا وبالأوي كمان..

فتحت اللابتوب أدور على اغنية مواويل الهوى لمحمد منير.. طلع لي الجزء الأشهر منها..طفي النور يا بهية.. برؤية جديدة .. كانت الاغنية عبارة عن مجموعة صور متجمعة من الشارع المصري بكل تناقضاته.. عينيا لقيتها بتسقط لوحدها.. انا مش سهل أعيط.. بس لازم اعترف اني كنت بعيط وانا بسمع الاغنية وشايف العسكر بيبهدلوا الغلابة في الشارع برعاية العادلي اللي غير شعار الشرطة من ” الشرطة في خدمة الشعب” الى ” الشعب والشرطة في خدمة الريس”..

وبدون تفكير مسحت دموعي واتريقت عليا.. ايه اللي انا بعمله ده.. اصلا النتيجة لسه متحسمتش.. واحتمال كبير حمدين يدخل.. وبعدين هما الاخوان مالهم يعني.. شفنا منهم أيه؟!

“4”

وأعدوا


الاثنين 28 مايو 2012 اخر النهار “اللجنة العليا تعلن رسميا محمد مرسي وأحمد شفيق يتنافسان في جولة الإعادة وترفض جميع الطعون”

 

 

لما سألت نفسي السؤال ده..

 هو الاخوان عملوا ايه وحش عشان نزعل منهم أوي كدة ؟؟

حسيت باستفزاز رهيب..ولقيت الأجوبة نازلة مني عليا كالصواعق ..

لأ شفنا منهم كتير..

أول حاجة ونحط تحتها ألف خط .. تخليهم عن الميدان .. مبرراتهم في ده..ان العسكري كان عايزهم ينزلوا الشارع ويصطدم بيهم وتبقى حمامات دم.. وكان من الحكمة انهم ميستدرجوش لحاجة زي كدة!!!!! وألف علامة تعجب..مبرر ميقنعش فرخة بيضا حامل!!! لأنهم لما عطفوا علينا ونزلوا الميدان(وياريتهم ما نزلوا) يوم الجمعة 28 يناير .. كان هناك حمامات دم بالفعل..وساعدونا وحمامات الدم وقفت.. بس كان ساعتها دمنا عندهم غالي ومكنش فيه كراسي..لما الكراسي جت دمنا رخص..أوووووي..

وطبعا لما هنقارن قمع العادلي بقمع (هما اللي توقعوه) من العسكري لو كان الاخوان نزلوا..طبعا العادلي يكسب .. فانت بتقول ايه يا عم الاخوانجي..حمامات دم ايه؟؟

وطالما بتخاف أوي كده على نفسك..سيب اللي مبيخافوش يعترضوا ويتعوروا ويتعروا وتتخرم عنيهم ويتسحلوا ويترموا في الزبالة .. سيبهم في حالهم يا اخي طالما انت حكيم وبتجنب البلاد شرور الفتن .. سيبهم يشتغلوا من غير ما تقول عليهم مندسين ومثيري الفوضى وبانديتا وبطل تنقل مانشيتات أسامة سرايا الحمضانة في الأهرام وتحطها عندك في جريدة الحرية والعدالة.. وعلى فكرة يا كابتن..فانديتا..مش بانديتا..

طبعا الاخوان لو قروا الكلام ده ..هيبدأ الحوار وهينتهي عند نقطة  اني اقسملهم بالله اني عارف ان الفراخ بتبيض..مبتولدش..وان دي كانت مجرد تريقة..أنا عارف ان الفراخ البيضا مبتحملش..

تاني حاجة ..تغيير مواقف..وبداية ظهوره كان في اعلانهم التنافس على ثلث كراسي البرطمان.. وطبعا زي ما كلنا شفنا التنافس كان على مية في المية من الكراسي..

ولما وصلوا البرطمان وقعدوا وفخدوا ع الكراسي.. تخليهم عن الميدان تحول الى استنكار النزول اصلا..وقالك الشرعية للبرطمان.. ونزعوا بقولهم الشرعية من الميدان..طيب أعمل حاجة بقى يا عم الشرعي.. قولي عملت ايه تضمن بيه نجاح الثورة..فين تشريعاتك اللذيذة؟؟

وفي نفس اليوم اللي الكتاتني تلى فيه بيان الداخلية وأكد ان الشرطة مبتضربش خرطوش..مراسل قناة النيل للأخبار عينه اتقفلت بطلق خرطوش!

وسمعنا “مصطفى بقري” بيقول ع البرادعي خاين بدون دليل ويتسقفله بحرارة..

وسمعنا أحد أعضاء البرطمان بيقول الشباب اللي في التحرير بياخدو متين جنيه في اليوم وشريط ترامادول..وطبعا ده مبلغ كافي لان عينه تتخرم أو يموت ويتشد يترمي في الزبالة.. وتاني يوم نفس العضو المطرطر يعتذر عن كلامه ويقول..مش كل الشباب اللي في التحرير مندسين .. بعضهم بس! شكرا ع التوضيح يا من أعطيت الضوء الاخضر للعسكر..

يعني مباعوش الميدان وبس..لا.. ده باعوه باللي فيه.. فاكرين الكراسي بتدوم..

وسكنتم في مساكن الذين ظلموا أنفسهم وتبين لكم كيف فعلنا بهم وضربنا لكم الأمثال ( 45 )سورة إبراهيم

كل اللي فات ده بقى حمادة..واللي جاي حمادة تاني خالص..

أعلنوا مشاركتهم في انتخابات الرئاسة بعد ما أكدوا بكل كوادرهم ومتحدثيهم وأعضائهم من أكبر راس لأصغرها أنهم لن يشتركوا في انتخابات الرئاسة..ونزلوا باتنين..وهبا عمر سليمان كمان نزل..أحد جلادي مبارك وأخلصهم له..

أحب افكر فضيلة المرشد..أنه قال ان نزول مرشح محسوب ع التيار الاسلامي في المرحلة دي خطر على مستقبل مصر وعلى هويتها أمام العالم الوحش المتربص.. طب ايه اللي حصل خلى ده بقى فجأة صح وانقاذ للوطن؟؟عادي.. زبادي خلاط..

كان الشيخ حازم صلاح أبو اسماعيل يعاني من حالة اقصاء مدروس ..معبرهوش..وعلى الرغم من اختلافي الكلي والجزئي مع ابو اسماعيل ..لكن مواقفه كانت أشرف من مواقف الاخوان..ولا تفوح منها الرائحة العفنة للصفقات..وما كان يوما بائعا للثورة.. وإلى ان تثبت جنسية أمه..أنا أصدقه..

نزل عمر سليمان ..أخيرا اعترف الاخوان بشرعية الميدان مرة أخرى فنزلوه.. وأدركوا فجأة أن البرلمان يصدر قوانين ..أصدروا تشريعا لاقصاء الفلول.. وهنا اود ان اصرخ بأعلى صوت..لماذا لم تحموا ثورتنا بمثل هذه التشريعات من البداية؟؟ و لماذا عرصتم للعسكر واستمر التعريص إلى أن ظهر عمر سليمان..لماذا ظهر قانون العزل فقط قبل الانتخابات الرئاسية بأسابيع قليلة جدا..ألم يكن الأولى والأجدر والأوقع والأكثر فاعلية أن يكون هذا التشريع أول قانون تصدروه في برلمان الثورة؟!!!!  عايز اقول كان زمانهم صدقوا عليه ونفذوه ومكانش شفيق ولا عمر سليمان تجرأوا على ثورتنا اللي انتو ركبتوها ورشحوا نفسهم أصلا..

ما كنتم يوما ثورجية وما كنت يوما راغبين في حماية الثورة..وتصرفاتكم تنبيء عنكم!

من ضمن مبرراتهم في نزول مرشحين للرئاسة..واحد أساسي وواحد احتياطي.. انهم عرفوا من مصادرهم الخاصة  ان العسكر هينزلوا عمر سليمان وهيطيروا حازم ابو اسماعيل.. وانا بصراحة مش شاي فده حقيقي..لان اللي ظهر أدامي انهم نزلو المرشح بتاعهم قام عمر سليمان نازل عشان يوزن المعادلة.. وسواء اللي هما بيقولوه صح او اللي انا شفته هو الصح..أهو عمر سليمان خرج بره السباق! ولكنكم بقيتم!!

لماذا فصلتم د.أبو الفتوح؟

فصلتموه لأنه كان أبعد نظرا..وهيا بنا نتخيل أنكم بعد ان اكتشفتم بعد نظره ووضوح الرؤيا لديه..نتخيل انكم اعتذرتم له ودعمتموه بدلا من العهر السياسي الذي رأيناه(مش هنقدم مرشح ونزلتوا باتنين ..عهر ده ولا مش عهر؟).. ما رأيك عزيزي المصري في هذا التخيل؟!

هل لو كان الدكتور وصل الى الاعادة كنا سنكتئب كل هذا الاكتئاب؟ ولكن كيف لمن كان ابعد نظرا واكثر حكمة أن ينجح؟ كيف يصح أن يكون هو على صواب وأنتم على خطأ فتفعلوا نفس الفعل الذي فصلتموه من أجله ثم ينجح وتخسرون؟؟ فلتذهب مصر للجحيم قرون ولا يهتز برستيج الجماعة يوما؟!

وبعد هذا التخيل..ماذا قدمتم لمصر بنزول محمد مرسي؟ أظنكم قدمتم لها تشرذما على تشرذم وفرقة على فرقة..

لماذا وأنتم تعلمون قيمة مشروع النهضة كنتم تودون أن تحرمونا منه بعدم ترشيحكم رئيسا ينفذه..واذا تلكأتم بانكم وددتم تنفيذه من خلال تشكيل الحكومة..لماذا قبلتم الجنزوري؟!وحدكم؟!ورفضته كل القوى السياسية والثورية الأخرى..وسيشهد التاريخ ان الثوار زحفوا الى مجلس الشعب ليعطوكم شرعية استلام السلطة من العسكري..ففاجأتمونا بأنكم أنزلتم شبابكم ليمنعوا الثوار من اعطائكم السلطة أو حتى المطالبة بذلك! بل و ناقشتم قانون تجريم التظاهر..التظاهر الذي أجلسكم على مقاعدكم الان بعد ان كنتم في السجون.. أي انبطاح هذا؟!!!

مبرراتكم كلها تذكرني بكلمات مبارك وهو يقول ان محدود الدخل من أهم أولوياتي في المرحلة المقبلة..والحزب الوطني..من أجلك أنت.. كلمات جوفاء خرقاء عاهرة..

والان لا أجد غيركم أمد يدي إليه..رسمتم لنا طريقا ..اجبرتنا جماعتكم على الدخول فيه..فهنيئا لكم..يدي ممدودة لكم..أرجوكم لا تعرضوا عني..

لا أريد منكم الشيء الكثير..أخبروني فقط أنني سيكون من حقي الدستوري أن أختار مرة أخرى.. لا ..لا ..لا تخبروني بأفواهكم.. فقط أخبروني بوثيقة مسجلة .. سجلوها ثم تنصلوا منها بعد ذلك ان شئتم.. لكن رفضكم التوقيع يقلقني..يقلقني جدا..ولكني لن أفقد الأمل فيكم..أعتقد أنكم ستصالحون الوطن..وستفرحون كل المصريين..بعد مسلسل طويل من الاحباطات..

 “5”

خلف و بريشة

 

الأربعاء 30 مايو 2012

استيقظت من النوم حزين ككل المصريين المهمومين بثورتهم التي تسرق منهم..فكان أول ما سمعت ..طفي النور يا بهية لمحمد منير.. حتى أذكر نفسي بجبروت العسكر..

اتضايقت جدا لما لقيت ناس كتير بتقول هتقاطع الانتخابات..كدة بتدوا فرصة للعسكر يركبوا تاني..إحنا جربناهم قبل كده 60 سنة..كفاية بقى بلاش نخليهم بايدنا 64 سنة.. الاخوان لو ركبوا وعملوا حاجة تضايقنا..هننزل الميدان وخلال يومين تلاتة الجيش يجيبهم من قفاهم ويسلمهم لنا في الميدان.. بلاش تقاطعوا يا جماعة..بلاااااااااااااش أرجوكم.. خلينا ندي للاخوان فرصتهم كاملة عشان معدش يبقى ليهم أي عذر..ده شفيق اللي قصادهم يا جدعان..شفيييييييييق..

واذا بالصدمة الكبرى تطيح برأسي ألف ألف متر إلى الخلف ..أحد أصدقائي المقربين على المستوى الشخصي وأحد أساتذتي الأعزاء على المستوى العملي..وأحد الشخصيات القليلة في دائرتي الذين استرشد بهم وأكون رأيا سياسيا من خلالهم..”محمد بريشة”.. ده لقبه..هنعمل أيه بقى!

محمد بردعاوي أصيل و مؤيد بشدة لحمدين صباحي..محمد هيدي صوته لأحمد شفيق في الإعادة..ودخلنا في حورات كتير هختصرهالكم ببشاعة..بس انتهت عند نقطة مرعبة..

وده  الحوار اللي دار بيني وبينه ..باختصار..

–        خلف :

محمد انا ببعتلك رسالة ع الخاص(عشان التواصل يفضل ممدود) عشان بجد مضطر اسفا وحزينا جدا اني اشيل بروفايلك من عندي مؤقتا..ارجوك تفهمني وتعذرني وتسامحني..بس بوستاتك بتحبطني..جدا..جدا..الى ما لا نهاية..ارجوك تسامحني وتعذرني..ارجوك..

–        بريشة :

براحتك يا محمد .. لا تعليق لدي

أول ما حسيت إني بخسر حد بحجم محمد بريشة ولو مؤقتا..اترعبت..وانا فاتح بروفايله وخلاص هدوس حذف صديق.. بعتله الرسالة

دي..

–        خلف :

انا بجد بعمل ده وانا حزين..وكنت بقرالك وبعتبرك جلال عامر التاني..
بس بجد مبرراتك لشفيق مش مخلايني استحمل اشوفها..وده لا يتعلق نهائي بشخصك الطيب اللي انا بحبه وبعتبرك اخويا الكبير في الحياة واستاذي في الارشاد

وده كان رده

–        بريشة :

يا محمد اشكرك علي اطرائك الذي لا استحقه , اوعي تفتكرني اني سعيد , انا بتقطع من جوايا , ولكن مش كل الاختيارات سهلة , بالعكس الاختيارات الحقيقية هي الاختيارات الصعبة , انا متاكد ان الثورة حاتكتمل , و لن تختطف ابدا في حالة واحدة , ان الكل يتفق ان المصلحة والمصلحة فقط هي في الاجماع الوطني , وان الاستئثار بشيء دون الجميع لن يفيد صاحبة , رسالة واضحة و قوية لابد من دفع تمنها و تمنها المرة دي باهظ جدا بس لازم يندفع و التمن للاسف هو انتخاب شفيق..

مفيش شيء يقدر يقف قدام شعب موحد و ثائر و لو كانت اعتي القوى في العالم , حتي الجيش لا يمكنه مواجهتنا واحنا صف واحد , بس فينا عيب , ان تلت الصف بتاعنا ناس انتهازية و قدرة بالفطرة , فلابد من تهديبهم لان لسه فيهم امل , انا لو اعرف ان مفيهمش امل كنت بترتهم من زمان , الثورة حاتنتصر لو الاخوان انضموا للثائرين باخلاص , ودي خلاصة الكلام

–        خلف :

بيقولك ميدان التحرير لو اشتعل هطفيه باللي فيه

  وبصراحة هيبقى معاه حق

–        بريشة :

يا محمد منصب رئيس الجمهورية في حالة وجود العسكر لا قيمه له ابدا علي الاطلاق

  يا محمد المنصب لو اخدوه الاخوان لن يعودوا لاحضان الثورة ابدا ولن يجدوا لها اي بد

  يا محمد انا مستعد ادي مرسي صوتي حالا بس يديني امارة

  يعلن تشكيل لجنة الدستور بالشكل العادل الطبيعي اللي لازم تتشكل علي اساسه مثلا

–       يديني وعد بمدنية الدولة و حق المواطنه

وإلا هيكون اسوأ من شفيق ألف مرة  يعتدر لي عن انتهازية الاخوان و تواطئهم

–        خلف :

ننتظر الأمارة يا محمد..لان لو مفيش امارة والله انا ما هديله صوتي..بس لو اتكتب علينا نختار ما بين عار أو دمار..منبقاش اشتركنا.. و لازم كل الضمانات دي تكون برعاية مؤسسه كبيرة زي الازهر مثلا..وتكون مكتوبة والقوى الوطنية كلها شاهدة وتوقع عليها..عشان هما وعودهم عاملة زي كلام الليل

–        بريشة :

أنا بكلمك وانا كلي ثقة في حكمي علي الاخوان اللي ماخابش ابدا , لن يعطوك ده ابدا , لانهم كاذبون , او علي الاقل دوائرهم العليا و قاداتهم

–        خلف :

أنا كمان مش هدي لمرسي صوتي..غير بأمارة..لكن لو ما ادانيش الامارة..انا مش هنتخبه ولا هنتخب شفيق..وهعيش مواطن مسالم راضي باللي يجيبه الصندوق

–        بريشة :

      علشان كده لابد من صفعة قوية جدا تهزهم و تهددهم بالفناء

..علشان يتعدلوا

  • يا محمد مصر دلوقتي لو حكمها القدافي و صدام حسين و جمال عبد الناصر نفسه ومبارك وعليهم السادات مش  حايقدروا يقضوا علي ثورتها ابدا ابدا ابدا.. أنا متاكد من اللي بقوله لك كاني شايف بكرة قدامي انما لو انقسمنا و اللي باعنا اخد حق خيانته خالص مخلص , عمره ما حيلتفت لينا واحنا بندبح و ثورتنا مخترقه

–        خلف :

مش في حالة انه جه بانتخابااااااااااااااااااااات يا محمد..محدش هيعبرنا..هنتضرب بالجزم وبالدبابات والطيران لو لزم الامر..الراجلجاي بانتخاباااااااااااااااااااااااااااااااات..يعني بطريقة شرعية مشروعة والخروج عليه فعلا خروج على الشرعية

–        بريشة :

نا متاكد تماما ان شفيق افضل عدو نواجهه لانه يتمتع بكل شيء تتمناه في خصمك , اولا كلما تحدث خسر , ثانيا في منتهي الغباء , ثالثا فاسد و يفضح اي حد يتستر عليه , رابعا غير براجماتي , خامسا بلا مظلة سياسية ولا حزب يسانده , و كل اللي يملكه رضا المجلس العسكري عنه و اللي باعه بعد مناظره مع الاسواني

لن يستقر الامر لشفيق ابدا , ولكن الاخوان حايكبسوا علي نفس الامه الي غير رجعة و حايدبروا مع المجلس العسكري كل اللي انت خايف منه و زياده عليه انهم اساسا مش حايكونوا معاك

–        خلف :

مش هيلحقوا..لو الصندوق جاب مرسي..المجلس العسكري هيستنى مليونية واحدة من الشعب ضدهم عشان يشيله..هيبيعه في ثانية زي ما باعهم في موضوع الحكومة

–        بريشة :

على فكرة يا محمد انا مقتنع برفضك لشفيق و عايز افاجئك انا فرحان جدا جدا بانك رافض بالشكل المخلص ده , و لكني عايز اضرب لك مثل علي الطريقة الاخواني , و حاشي ان اكون باقارن نفسي بانبياء الله انا ادني بكثير من ان اقارن حتي بحذاء نبي الله موسي و سيدنا الخضر , لكن اعتبرني باخرق لك سفينه وانت باخلاص سيدنا موسي بتنهرني ,و لكن خبرتي بالاخوان (حتي بسبب عشرتي لهم اكتر منك ) بتخليني مصر علي انهم يخسروا و اصوت لشفيق

–        خلف :

بصراحة تشبيه في قمة الروعة

–        بريشة :

–       أنت اللي في قمة الروعة يا راجل يا محترم ..اللي يوافقني علي انتخاب شفيق بدون ما يفهم مني ليه انا بصراحة بينزل من نظري

–       لاني انا اساسا نزلت من نظري ولكن انا ببص لقدام , صدقني يا محمد الخير للثورة فقط لو الاخوان انضموا لها في صفوف الثائرين و بقلب , و لن يفعلوها الا لو اتهددت مصالحهم بشكل كبير

أنا مكنتش قادر أقتنع بكلامه..ولكن أكتر جملة علقت في دماغي لما قالها في احد التعليقات الكتير بيني وبينه إن مفيش حد يقدر يتفاوض مع الاخوان الا اذا كانوا في موقف ضعف!

وبصراحة كنت عايز أرد عليه وأقوله ان مهما بلغت قوة الاخوان مش هتوصل لجبروت العسكر..لما ندي للعسكر يبقى بنطول حكمهم من 60 سنة ل 64 ..اما الاخوان محموش قبل كدة عشان نقول عليهم جبروت..ده حيالله خدوا سلطة تشريعية..أي نعم ما أفادوش الثورة بيها..بس التنفيذ مكنش في ايدهم وبصراحة انا لو هختار ما بين عسكر قتلني واخوان سكتوا على قتلي.. هيبقى صوتي لمرسي وأي حد هيقول مقاطع مش هسيبه غير لما يقتنع انه يصوت لمرسي.. واللي هيصوت لشفيق بعد اللي سمعته من “بريشة” مش هقول عليه باع دم الشهدا وبيدور على جلاد..لا ده ممكن يكون وطني اكتر مني..

لكن اللي حصل معايا بالليل غير كل تفكيري وخلاني أبقى مقتنع مية في المية بإن أحسن حل للي احنا فيه وعشان الواحد ضميره يستريح إنه..

وللحديث بقية..

________________________________________________________________________________

“الحلقة الأخيرة”

دكتور الأسنان ونائب البرلمان

وانا بركن العربية تحت عيادة الدكتور لقيت عضو مجلس شعب عن حزب الحرية والعدالة واقف بيتكلم مع اتنين.. لقيتها فرصة أجري عليه واشرحله احساسي.. وهحاول أنجز عشان ميعاد الدكتور..

أنا:بسعادة وتفاؤل واقبال على الحياة..سألته..

ازي حضرتك يا فندم؟أنا سعيد جدا اني واقف مع حضرتك دلوقت..

هو: بأدب جم وابتسامة هادية وتواضع بلا حدود..

الحمد لله .. الشرف ليا..

أنا:

معاك “محمد خلف”..مرشد سياحي.. وكان ليا رجاء عند حزب الحرية والعدالة

هو: باستغراب وشيء من التوجس

اتفضل..

أنا : بتفاؤل..

المرحلة اللي احنا فيها دي يا فندم محتاجة ان احنا نتوحد تحت رايتكم في مواجهة بقايا مبارك..و..

وقبل ما اكمل..

هو: مقاطعا بأدب..

وده دور كل انسان شريف خايف على البلد إنه..

أنا : مقاطعا بأدب..

اسمحلي أكمل يا فندم..أنا عايز اقول لحضرتك ان انا عايز جماعة الاخوان تقطع الطريق على الفلول بمنتهى القوة..يعني لازم..

جرس هاتفه يرن..فلا استطيع انا ابتلع باقي الكلام.. فأقوله لأحدهم..

لازم نتوحد كلنا تحت راية الاخوان..عشان منسيبش خرم إبرة لشفيق ينجح منه..لما يكون الصف الوطني متوحد كله..شفيق مش هينجح..غير كدة ممكن الانتخابات يتلعب فيها وشفيق ينجح..

عضو المجلس ينهي تليفونه..ويلتفت لي مرة ثانية.. فأعيد ما قلته..

لما نكون كلنا وراكم ومعاكم يا فندم ..والرأي العام و كل العالم يشوف توحدنا .. شفيق مش هياخد غير أصوات الحزب الوطني والمنتفعين من الفساد..ودول مش هينجحوه..ولو نجح هتبقى واضحة لكل الناس ان الانتخابات اتزورت..

يقاطعني أحد المطبلاتية قادما من بعيد صارخا بلهفة وود غاية في التصنع:

الأستاذ (فلان الفلاني) بنفسه ..وأنا أقول الشارع منور ليه..والله منور الشارع والدنيا كلها يا أستاذ (فلان).. وانا بدعي ربنا يصبرني عشان اخلص واطلع للدكتور بقى.. لكن وصلة التطبيل استمرت شوية كمان لحد ما سيادة النائب جاله تليفون تاني..

أول ما سيادة النائب خلص تليفونه..لقيت واحد كمان انضم لنا ..فصيلة المطبلاتية المنطقيين نوعا ما.. دخل في حوار سريع مع سيادة النائب..

وانا واقف على نار عايز اوصل رسالتي.. واتطمن منه على ان توجه الاخوان هو مصالحة القوى الثورية وقيادة المرحلة والعبور بالثورة الى بر الأمان..زي ما انا كنت متوقع وكنت بحارب في الشارع مع الجيران وع القهوة مع الأصدقاء واقولهم ان المقاطعة في صالح شفيق..وان شفيق ضد الثورة..ع الاقل الاخوان كانوا مع الثورة في وقت من الأوقات وعمرهم ما أراقوا دم ولا سحلوا ولا عروا ولا فقعوا عينين..وعمرهم ما قالوا للأسف الثورة نجحت زي شفيق ما قال..وفي حربي ضد الفلول كنت مجهز موبايلي بمجموعة من الفيديوهات لشفيق ..اللي بيتوعد فيها اللي هيشعلوا ميدان التحرير .. فيديوهات تثبت ولاؤه الشديد لمبارك..

أنا : باستعجال..

أنا كنت بقول لحضرتك لو نصالح كل القوى السياسية..ومنسيبش حد متردد انه يروح ينتخب في الاعادة او ميروحش..يعني لو حزب الوسط والوفد وستة أبريل وكفاية وحمدين وابو الفتوح أعلنوا تأييدهم للدكتور مرسي ..ولقينا شفيق كسب؟! يبقى تزوير وش.. لكن لو القوى الثورية دي كلها فضلت زعلانة..ودخلنا الاعادة وهما مترددين..وشفيق كسب حتى بالتزوير..محدش هيقدر يعمل اي حاجة..ونبقى كلنا خسرنا..لازم تصالحوا كل الناس يا أستاذ (فلان)..أرجوك

هو : باستغراب

هي الناس زعلانة مننا ليه أصلا..إحنا مش مخاصمين حد عشان نصالحه..

أنا : بصدمة التنين

لا الناس كلها زعلانة من الاخوان يا استاذي ومعدوش بيصدقوهم من كتر ما بتغيروا كلامكم ومواقفكم..

هو: بابتسامة هادئة ووجه بشوش

بالظبط اللي انت بتقوله ده هو اللي قدر يوصله الاعلام الفاسد المضلل للشعب .. انت عارف القنوات المشهورة دي بتاعة مين..دي كلها بتاعة..

أنا: مقاطعا بشيء من العصبية

عارف والله بالاسم كمان..بس هما نجحوا يوصلوا رسايلهم المضللة للشعب عن الاخوان اللي كانوا في نفس الوقت متعاونين مع الاعلام الفاسد في توصيل نفس الصورة القبيحة اللي الناس كونتها عنكم..يا فندم مواقفكم تتحدث عنك..مش مستنية الاعلام الفاسد يشوهكم..

هو: بضيق واضح سألني..

مواقف زي ايه؟

أنا : مستدركا حتى لا يرجع الحديث لاحداث بعيدة مثل محمد محمود (التي لا اتفق معها وكنت ارى ان الميدان يكفي) وغيرها..

يا أستاذي المجال لا يتسع اني اتناقش في المواقف اللي مزعلة الناس دلوقتي..انتو ممكن تضربوا الاعلام المضلل في مقتل بالمصالحة والتوافق..

هو: بوطنية واخلاص حقيقي

والله ما نقدر نعمل ده لوحدنا..احنا محتاجين كل مواطن شريف خايف ع البلد زي حضرتك يساعدنا ويقف جنبنا

أنا: بصراحة

مقدرش اعمل كدة وانتو بتتصرفوا بطريقة متطمنش المواطن العادي اللي مستني منكم شوية مرونة ومستني منكم التوقيع على وثيقة تصالح..

المطبلاتي يقاطعني صارخا :

الناس الظلمة ماشية تقول الاخوان معملوش حاجة في المجلس..ميعرفوش حجم الانجازات اللي انتو بتعملوها..والقنوات الزبالة اللي بتحشي دماغ الناس كذب وافترا والله حرااااااااااااااااام حرااااااااااااااااااااام..

صوت المطبلاتي خض الدكتور في عيادته وخلاه يبص في الشارع يسأل هو فيه أيه ..كان مفكر ان فيه خناقة..

هو: بشعور بالانتصار وشيء من الاستنكار

انت مشفتش المؤتمر الصحفي بتاع الدكتور مرسي امبارح والتعهدات اللي قالها..دي مش كفاية انها تصالح الناس؟؟؟! لازم نبقى منصفين شوية..

أنا: بدهشة وامتعاض

التعهدات دي بتفكرني بتعهدات المرشد العام والكتاتني وخيرت الشاطر وعصام العريان والبلتاجي و.. و.. انكم مش هتنزلوا مرشح للرئاسة ومش هتستفردوا بلجنة الدستور و.. و..

انا اسف جدا يا استاذي انا فعلا معدتش بصدق تعهداتكم البوقيقي..

هو: بنفاد صبر..

يعني أيه المطلوب بالظبط؟

أنا: بنوع من الارتياح..

أنكم توقعوا على وثيقة مصالحة مع القوى الوطنية كلها..يتكتب فيها التعهدات دي..

هو:

احنا وقعنا على وثيقتين قبل كدة..مش كفاية ؟

أنا:

لا يا فندم الظروف مختلفة..واحنا محتاجين لكم وانتم محتاجين لنا..ليه منكتبش ده في عقد..عشان كله يبقى مطمن؟

هو:

وأيه بالظبط اللي انتو عايزينا نوقع عليه؟

أنا:

ان رئيس الحكومة ميبقاش اخوان..وان احد النائبين ميبقاش اخوان..والدستور يبقى لكل المصريين..

هو:

ده ابتزاز..اما تقيدني بحكومة مش اخوان..ونائب مش اخوان..هنشتغل ازاي..والشعب ييجي يحاسبني بعد اربع سنين على اخطاء غيري وانا اشيلها عنه ليه؟ لو دي حسبتكم يبقى احسنلي اقعد في بيتنا لو مش هعرف اخدم الناس..واحسنلكم متتنتخبونيش..

أنا: بدهشة..

يا أستاذي والله انا مقصدش..بس ده مش ابتزاز ..ده تطمين للناس انه يبقى فيه تداول سلطة..وبعدين انتو اللي هتختاروا رئيس الحكومة..يكون شخصية مشهود ليها بالنزاهة..أكيد مش هيقيدكم طالما اللي هتعملوه لصالح البلد..

هو: بنفاد صبر

أنا مقدرش اسمي ده غير ابتزاز

أنا : بضيق شديد

حضرتك كدة بتثبتلي ان اللي هيقاطع على حق..

هو:

والله كل واحد براحته

مشيت وسبته وانا بنفخ وبكلم نفسي وبيمر ادامي كلام محمد بريشة زي شريط فيديو..حمدت ربنا اني متسرعتش وحذفته عشان تأييده المبرر لشفيق..

طالع ع السلم ناوي اتخانق مع الدكتور عشان اللي انا شفته عنده في العيادة المرة اللي قبلها..

وبعدين افتكرت اني مينفعش ازعل دكتور الاسنان مني لأي سبب طالما هفتحله بوقي..بجد كنت عايز اقولكم أيه حصل مع صديقى الأنتيم أحمد لما ضايق دكتور الاسنان بتاعه.. بس مش وقته..

دخلت للدكتور ..وانا ناوي اعاتبه بهدوء ..لقيته بيسألني هنتخب مين..قلتله أنا كنت هنتخب مرسي بس دلوقتي وبعد الحوار الرائع مع سيادة العضو قررت أقاطع ..قالي حرام عليك يبقى انت كده بتزود فرصة

Wait for it

مرسي.. انت لازم تنزل وتنتخب شفيق!!!!!!!!!!!!!!!!!!!

ساعتها انا استعرت الكلمة الأشهر لشفيق وقلت..إيه؟!!!!!!!!!!!!

طبعا كانت صدمة عمري..وبالذات اني شفت عنده اللوجو بتاع الحرية والعدالة ع المكتب..وده اللي كان واجع قلبي.. ان الدكتور يبقى اخوان.. وطبعا ده كان واجع قلبي عشان الاخوان باعوا الثورة عشان السلطة وعشان الكراسي..

ودخلنا في مناقشة هادئة جدا قالي ان اللوجو ده من ايام انتخابات مجلس الشعب لما زاروه وطلبوا منه يأيدهم وهما هيبعتوله زباين والذي منه وهو رفض قالهم المريض اللي يجيلي يبقى جاي على اسمي وبس..

 لكن كان اسخن حاجة في المناقشة انه في منطقة قريبة جدا لبيته اكتشفت القوات المسلحة بيت مليان سلاح..مش مقاريط (مسدسات محلية الصنع بتضرب خرطوش) ومطاوي وكده..لأ.. صواريخ أرض جو..ومضادة للطائرات..وقذائف تقيلة.. بيت قديم مقفول ومليان سلااااااااااااااح..

فسألته وايه علاقة الاخوان بالموضوع ده؟ سألني..لو السلاح ده مش بتاع الاخوان يبقى بتاع مين؟!

بعد حواري مع سيادة النائب والدكتور .. روحت البيت وانا حاسس بجسم غريب في بوقي..وبجسم أغرب في مخي .. بالنسبة للجسم الغريب الأول .. كان التركيبة .. اول مرة اعمل تركيبة في سناني..

 وبالنسبة للجسم الغريب التاني ..كان الخازوق..أول مرة أخد خازوق في في مخي..

ومبقيتش عارف أعمل ايه؟ لكن صورة الاخوان بقت أوضح بالنسبة لي..دفاعي عنهم اتحول لصمت..وهجومي على شفيق اتحول لمراقبة..

مرسي مع يسري فودة..ومحمود فوزي بيقولي أن وجع دكتور الاسنان أسهل كتير من مشاهدة مرسي يتحدث.. يا محمود صلي ع النبي ..مفيش وجع اصعب من وجع الاسنان..بس لما جربت بنفسي لقيت محمود معاه حق.. حظي الاسود اني فتحت ع الجزء بتاع المصري اليوم لما يسري سأله انت ليه مرفعتش قضية ع الجرنال لما قال كلام غير اللي انت قلته؟؟ فمرسي قاله كان عندي قضايا تانية كتير..ده مبرر يا راجل ؟؟ يعني انت مقولتش على زكريا عزمي وبطرس غالي والشلة العكرة دي رموز للوطن؟ ولما كتبوا كلام غير اللي انت قلته مرفعتش قضية عشان كان عندك قضايا تانية كتير؟! فعلا حشو العصب أسهل من الاستماع لمرسي..

احب اهديلكم اغنية محمد رشدي يا اخوان يا مسلمين..اسمعوها بتمعن..اه نسيت..انتو مبتسمعوش أغاني عشان حرام..انما بتسمعوا صرخات القتلى في الميدان عشان حلال..

هسمعها انا عشان تبرد ناري شوية..داااااااااااااااااااامت لمين؟؟ الله يرحمك يا محمد يا رشدي والله..

واللي قال ان اختيارنا ما بين مرسي وشفيق..هو اختيار ما بين اللبوس والحقن..أحب اقوله أنا مبخدش ده ولا ده.. انا لما بمرض باخد كبسولات..أو أكرملي افضل عيان..

مبحبش حد يشوف (طييت).. أرقد في السرير بكرامتي أحسن..

وأحب أقول ان قراري لحد هذه اللحظة اللي فيها كلام عن مجلس رئاسي ومليونية 5 يونية..وبعد الحكم بالبراءة على رئيس جهاز أمن الدولة عصاية مبارك الغليظة..وعلى مساعديه بردو بالبراءة..ورسايل شفيق المطمئنة ..وتعاملات الاخوان المتكبرة .. قررت إني أقاطع الانتخابات أو ابطل صوتي.. لاني لو تم اجباري ان اختار بين الاسهال والامساك.. هختار اني افضل زي ما انا .. واعمل (بي بي) طبيعي..

تمت

يونيو 2012

Advertisements
دكتور الاسنان ونائب البرلمان

16 thoughts on “دكتور الاسنان ونائب البرلمان

  1. heba says:

    يااااااااااااااااة يا محمد فكرتنى بيوميات مرشد سياحى وانت بتحكيها
    فين الباقى يا بطل

  2. @ Heba: أنا كمان مفتقد يوميات مرشد سياحي ..ربنا يرجعها بالسلامة 🙂
    @ Amr: وما بقي كان أوقع ..بس هيبقى تقيل على قلب الاخوان أوي
    @Hadeer: ان شاء الله الأجزاء الجاية تعجبك أكتر يا هدير..شكرا على مرورك..الجزءين الرابع والخامس نازلين كمان شوية ان شاء الله 🙂

  3. محمد خلف مرة اخري يكون له الريادة في نوع جديد من الكتابة ……..شيء ما بين الفلسفة و الواقعية , او ممكن الاتنين مع بعض ……مرر حلقي مرة و حلاة مرة تانية ……….. ساعات ناس كتير بيكون في صدرها الم و افكار و تقعد تدور بالايام و يمكن بالسنين و يمكن عمرها كله عشان تلاقي اللي ممكن تفضفض معاه بحرية عنهم و فرحتها بتكون كبيرة اوي لما بتلاقيه ……… لكن انك تلاقي اللي بتفضفض معاه و يقول اللي انت حاسه و يرصلك افكارك قدام عينيك و يقولك المك هو المي و فكرك هو فكري ده في حد ذاته هدية مبتكررش كتير
    محمد يا علي شكرا علي انك سبقت عقلي و خلتني اقول علي الملاء اللي حاسه قبل ما يتكون افكار فيمتلك لساني القدرة علي النطق بيه
    بحب مواطني محمد خلف و بحب فيه انه ساعات بيكون نفسي اكتر مني و بيكون بيتجول جوه عقلي في وقت ما انا تايه مش عارف ابدأ منين
    متسكتش يا ابن خلف و اتكلم و دي مش فلسفة و لا مجاملة صديق انما دي بقت حياتنا و واقعنا ………. الكلام مبقاش عيب و الاعتراف مبقاش جريمة و الفضفضة بقت علاج مش مرض لازم نعالجه
    عاوزك العشرين سنة اللي جاية من عمرنا و محتاج كلامك عشان تبيض الصفحة و احط نقطة عشان ابدأ من اول السطر

  4. Mustafa Mansur says:

    فعلا بتوثق حقبه مهمه اوى اوى ولسان حال كتييير من جيلنا … استاذ يا محمد والله

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s